Sipa

Mga Sagol:

1 ka kilo nga ginaling nga karneng baboy
1 ka kutsara nga hiniwa nga ahos
1/8 ka kilo nga kutchay (chinese leaves)
1 ka karot nga hiniwa
1 ka lindog nga dahon sa celery
2 ka tasa nga hiniwa nga sibuyas
4 ka kutsara nga asukal
5 ka kutsara nga toyo (soy sauce)
1/2 sa kutsara nga paminta
sesame oil
3 ka kutsara nga oyster sauce
1 ka kutsarita nga chicken powder
mantika
3 ka kutsara nga chinese wine
1 ka tasa nga soup stock
cornstarch ug tubig
spring roll o lumpya wrapper

Paagi Sa pagluto:

Painiton ang mantika sa kaha. Igisa ang ahos hangtud nga mo golden brown. Idugang ang ginaling nga karneng baboy hangtud mo golden brown. Idugang ang toyo, oyster sauce, paminta, asukal, chicken powder, chinese wine, sesame oil, soup stock, kutchay, karot, sibuyas ug celery leaves. Sagol-sagolon hangtud nga maluto.

Sugyot:

Kinahanglan ang cornstarch adunay tubig isagol para di magtibuok-tibuok ug magporma ug lingin ang ginaling nga karneng baboy.

Tabason ug triyanggulo ang lumpya wrapper. Pabugnawon usa ang mga lamas ayha puston.

Sugyot:

Doblehon ang wrapper aron di dali mabasa ang ilawom ug mabuslot. Iprito hangtud nga mag-golden brown.

Nilung-ag Nga Bulinaw

Mga Sagol:

Kamyas
Bulinaw
Asin
Luy-a
Kamatis
Tambok sa karneng Baboy
Dahon sa Saging

Paagi Sa pagluto:

Timplahan ug asin ang Bulinaw. Isagol ang Luy-a sa Bulinaw aron mawa ang langsa. Magbutang ug kamyas sa kaldero o kulon. Mogamit ug tambok sa karneng baboy ug ibutang sa kaldero o kulon aron momantika.

Himuon ug porma sa torotot ang dahon sa Saging. Sa dahon sa Saging isulod ang bulinaw ug butangan pod ug hiniwa nga mga kamatis. Ibutang ang mga naputos nga mga bulinaw sa sulod sa kaldero o kulon ug hulaton nga maluto ang Bulinaw.

Pag-andam Sa Sawsawan:

Magkuha ug kamyas gikan sa sulod sa kaldero o kulon ug durugon, dayon sagulan ug patis.

Nasi Goreng

Ang Nasi Goreng usa sa mga klase sa sinangag nga luto o fried rice.

Mga Sagol:

1/2 ka tasa sa ginaling nga karneng manok
1/4 ka tasa ginutad nga pinanitan nga uwang
3 ka klabo nga ahos hiniwa
1 murang sibuyas (leek) hiniwa
4 ka buok nga sibuyas (shallots) hiniwa
1/4 ka tasa ginuhayguhay nga repolyo
1/4 ka tasa nga taugi
2 ka buok nga Thai red chili hiniwa
2 ka kutsara nga Kekap Manis (sweet soy sauce)
asin ug paminta
2 ka tasa bahaw nga luto (cooked rice)
1 ka nilapwaan nga itlog
Fried Kropek (Krupuk) mapalit ni sa Asian Section
sibuyas
coconut oil

Paagi Sa Pagluto:

Magbutang ug coconut oil sa kaha. Kung mo init na ang mantika, igisa ang ahos ug isunod ang mga sibuyas. Ilunod ang ginaling nga karneng manok hangtud nga muputi ang kolor. Isunod ang ginutad nga uwang, dayon ang red thai chili. Timplahan ug asin ang karne ug ilunod ang bahaw nga luto ug sagulon pag-ayo. Ilunod ang Kekap Manis, repolyo ug ang taugi. Igisa ug bale 2 ngadto sa 3 ka minutos o labaw pa hangtud nga maluto.

Kon gusto ka nga i-plating inigkaluto, kini ang buhaton:

Ibutang sa plato ang imong niluto. Paibabwan ug pinabukalan nga ginuhayguhay nga karneng manok, hiniwa nga nilapwaan nga itlog ug kana pod Kropek, basta kamo na ang bahala sa pag-arte ana.

Seafood Kare-Kare

Mga Sagol:

mantika, ahos, sibuyas
asin, paminta, asuete,
fish broth (tubig pinabukalan sa tahong)
peanut butter
alimango, sugpo, tahong
string beans (abitswelas)
talong, pechay

Paagi Sa Pagluto:

Magbutang ug mantika sa kaha. Kung mo-init na ang mantika, igisa ang ahos ug ang sibuyas. Ilunod ang alimango. Isunod ang sugpo, dayon ang tahong. Ilunod ang tubig kadtong pinabukalan sa tahong ug timplahan. Idugang ang asuete depende sa kolor nga imong gusto ug ang peanut butter. Ilunod ug una ang string beans kay dugay-dugay pa ni siya maluto, kon hapit na maluto, isunod ang talong, dayon ang petchay.